Ода-кора тӧлысь 15-ӧд лунӧ лоины тӧдсаӧсь «Коми велӧдысь – 2018» коймӧд республиканскӧй конкурсын вермысьяс. Кыпыд гаж муніс Коми Республикаса войтырлӧн ёртасян керкаын.
Казьтыштам, синсайса тшупӧд бӧрын финалӧ петіс 12 велӧдысь да кагульнича. Кык лун чӧжӧн конкурсӧ пырӧдчысьяс петкӧдлісны «Визит карточкаяс», вензисны да дорйисны ассьыныс видзӧдлассӧ «Кытчӧдз лоӧ сьыланкывъя коми, сэтчӧдз вужйыс му вылысь оз ор» гӧгрӧс пызан сайын да петкӧдлісны кужанлуннысӧ мастер-класс дырйи.
Медбур велӧдысьӧн лои Удора районса Кослан школаын коми кыв велӧдысь Анастасия Бушенева, а медся бур кагульничаӧн Кӧрткерӧс районса Висер детсадйын уджалысь Таиса Михайлова. Буретш найӧ петкӧдласны-нимӧдасны республиканымӧс Мӧскуаын «Чужан кыв, сы лыдын роч кыв» велӧдысьяслӧн ставроссияса мастер-класс дырйи.
Таво жюриын медводдзаысь уджаліс Коми Республикаса войтырлӧн ёртасян керкаын директорӧс вежысь, Кыв технология сӧвмӧдан шӧринӧн веськӧдлысь Марина Федина. Сійӧ тӧдчӧдіс, мый тайӧ конкурсыс зэв тӧдчана да колана.
«Зэв бур, мый эм торъя конкурс коми кыв да литература велӧдысьяслы да кагульничаяслы. Найӧ тӧдмасьӧны ӧта-мӧдлӧн уджӧн, юксьӧны опытӧн, босьтӧны аслыныс мыйкӧ выльтор. Конкурс дырйи велӧдысьяс отсасисны ӧта-мӧдыслы, лоины ёртъясӧн. Эска, мый йитӧдыс налӧн оз ор. Вермысьясӧн лоисны том велӧдысьяс, сідзкӧ коми кывлӧн эм аскиа луныс. Сиам аньяслы бура петкӧдчыны федеральнӧй тшупӧдын. Кутам лача, мый сэні найӧ тшӧтш лоӧны вермысьясӧн», — пасйис Марина Федина.
Содтам, ставсӧ вӧлі лӧсьӧдӧма коми кыв вылын. Сёрнияссӧ роч кывйӧ вуджӧдісны Канму нимсянь вуджӧдчан бюроысь Королева Анна да Паршукова Александра.
* * *
Тайӧ нуӧданторлы подув кутысьыс: Коми Республикаса велӧдан, наука да том йӧз политика министерство.
Котыртысьяс: Коми Республикаын велӧдӧм сӧвмӧдан институт, Коми Республикаса национальнӧй политика министерство, Коми Республикаса войтырлӧн ёртасян керка, «Коми войтыр» дінмукостса ӧтйӧза ӧтмунӧм.
Фотояс Коми Республикаын велӧдӧм сӧвмӧдан институт сайтысь да Коми Республикаса войтырлӧн ёртасян керка пресс-службаысь.
