Пырӧдчим Пушкинлы сиӧм марафонӧ

Талун, 2018ʼ лӧддза-номъя 6ʼ лунӧ, Коми Республикаса войтырлӧн ёртасян керкаын муніс Пушкинлы сиӧм поэзия марафон. Нималана гижысьлӧн кывбуръясыс юргисны рочӧн, комиӧн да мукӧд кыв вылын.
Кыв технология сӧвмӧдан шӧринса уджалысьяс тшӧтш пырӧдчисны марафонӧ. Найӧ лыддисны рочӧн да комиӧн Пушкинлысь «Другъяслы» кывбур.
«Миянлы вӧлі зэв нимкодь пырӧдчыны тайӧ кыпыд гажӧ. Зэв тӧдчана, мый нималана поэтлӧн кывбуръясыс юргӧны тшӧтш коми кыв вылын. Таын пайыс эм и Иван Куратовлӧн. Буретш сылысь вуджӧдӧмсӧ лыддисны миян шӧринса уджалысьяс. Ӧльӧксан Пушкин кыпӧдіс-сӧвмӧдіс роч гижӧд кыв, а Иван Куратов пуктіс подув коми литературалы», — пасйис Коми Республикаса войтырлӧн ёртасян керкаын директорӧс вежысь, Кыв технология сӧвмӧдан шӧринӧн веськӧдлысь Марина Федина.

Go to top